يا وطن عمال بتحبل والبطون البايرة شايلة خزى عارك
و انتهاك أرضك و عرضك و انكسارك..
فوق يا غافل ياللى متكتف بصمتك..
شم ريحة دمى يمكن تفتكر انى فصيلتك
كان منانا ان عودنا يشب وانت بترعينا..
كان منانا اننا نلأك حمانا
و انت فى المحنة تلاقينا
فوق سكك كل المدافن لو هاتسال كل حرف فى كل آيه اترتلت على روح شبابك
او كل قبر اتحنى رمله بلون عذابك
لا هتلاقيك و لا هتلاقينا
....انتهينا...
كل أشلاقنا ودمانا راسمه بيها نعال جنود الاحتلال الخارطة لينا
كل دمعة بنبكى بيها عيال بتصرخ م السنين
اللى بتجلد حلمنا بسياط ملانا جروح دواها
اننا نحطم لجامنا بالتوحد
مش تبلد
يكتم الهمس ف شفايف فوق ببانها مات زئير الحق
و اتكفن بنابه
الرموش قطبان بتقتل فينا احساس البطولة
جوه سجن(غريب)فى حضنك اتقلع توب الرجوله
مش غريبه
مانت اصبحت الزريبه
و احنا..
اصبحنا المواشى
و اللى منك قالوا حاضر
و اللى منك قالوا ماشى
فى أختبار القرن شفتك
فى الشهاده لقيت نتيجتك
أختبار الصبر ماخد نمره عليا
يعنى مش محتاج دروس
اختبار الصمت واخد ميه ميه
مع بنود ذل النفوس
أختبار الاقتصاد مكتوب يعاد
اختبار القوة واخد كحكه
فيها نصيحه غاليه
و النصيحه
اوعى تغضب من رسوبك فى اختبار القوة خالص
كنت فارس
و الحصان هو اللى خانك
النجاح باين فى خوفك
وف سكوتك
و ف صياع معنى الوجود اللى ف ملامحك
اللى هيأ لينا موتك
انت فرقت لنجاحك كام عطيه
و احنا قبلين الهديه
شد حيلك للقرون اللى هاتبدأ
-خلى بالك-
احتمال يلغى امتحانك لو ثبت ان انت عندك اى مبدأ
ذاكر الصبر فى مراجع عصر أيوب المحدث
ذاكر الصمت فى مراجع
احدث الاجيال خضوعا
الاقتصاد ذاكره فى مراجع
عولمتنا تمشى حالك
ذاكر القوة فى مراجع
كل حاجه و ليها ناسها
اوعى تنسى
.........انتهينا.......
يبقى مبروك
...........استبينا........
موضوع: استبينا 
الأربعاء أغسطس 29, 2007 10:42 am
